1 हजार 10 रोजंदारी एसटी कर्मचार्‍यांचे निलंबन मागे
हे रोजंदारी कर्मचारी महामंडळाच्या सेवेत मागील दोन ते तीन महिन्यांपूर्वीच रुजू झाले होते. या कर्मचार्‍यांचा अघोषित संपाशी काहीही संबंध नव्हता तरी देखील हे कर्मचारी संपात सहभागी झाले होते. त्यामुळे एस.टीचे आर्थिक नुकसान होतांना प्रवाशांची प्रचंड प्रमाणात गैरसोय देखील झाली. या सर्व पार्श्‍वभूमीवर स्थानिक प्रशासनाने अशा सर्व कर्मचार्‍यांचे निलंबन करण्यात आले होते. निलंबनाचा हा निर्णय मागे घेण्याबाबत प्राप्त झालेल्या विनंतीचा सकारात्मक विचार करून हा निर्णय मागे घेण्याबाबत परिवहन मंत्र्यांनी निदेश दिले होते. महाराष्ट्र राज्य मार्ग परिवहन महामंडळाने या आदेशाचे पालन करत अशा कर्मचार्‍यांना पुन्हा नव्याने नियुक्ती देण्याचे निश्‍चित केले असून, यासंदर्भातील परिपत्रक आज 25 जून रोजी निर्गमित केले आहे. या परिपत्रकाप्रमाणे ज्या चालक तथा वाहक (कनिष्ठ) , सहाय्यक लिपिक-टंकलेखक (कनिष्ठ) यांनी दि. 8 जून 2018 व दि. 9 जून 2018 रोजी झालेल्या अघोषित संपात सहभाग घेतला आहे व ज्यांची सेवा विभाग/ घटक प्रमुख यांनी समाप्त केली आहे अशा सर्व कर्मचार्‍यांना 1 जुलै पासून नव्याने नियुक्ती दिली जाईल.
