जामखेड नगरपरिषद कर्मचार्यांच्या महागाई भत्यावर अधिकार्याचा डल्ला?
याबाबत सविस्तर माहिती अशी की, जामखेड नगरपरिषदेच्या चतुर्थ व तृतीय श्रेणीमधील एकून 160 कर्मचार्यांना महागाई भत्त्याची रक्कम शासनाकडून प्रत्येकी 54 हजार याप्रमाणे नगरपरिषदेच्या खात्यावर जमा झाले. सदर रक्कम प्रत्येक कर्मचार्यांच्या खात्यावर वर्ग करण्यापुर्वी संबंधित आधिकार्याने काही कर्मचार्यांमार्फत गुरूवार दि.19 एप्रिल रोजी सफाई कामगार कामावर हजर होण्याच्या म्हणजे भल्या पहाटेच्या वेळी महाराष्ट्र बँकेच्या विड्रॉल स्लिपवर साहेबांनी सांगितले आहे असे म्हणून सफाई कर्मचार्यांच्या सह्या घेतल्या. त्याच दिवशी कर्मचार्यांच्या खात्यावर 54 हजार रुपये जमा झाल्याचा मेसेज आला. तर काही तासातच चतुर्थ श्रेणीतील सफाई कामगारांना कर्मचार्यांना 6 हजार तर तृतीय श्रेणीतील कर्मचार्यांना 15 हजार रुपये आपल्या खात्यातून काढण्यात आल्याचा मेसेज आला. आपण पैसे काढले नाहीत तरी, आपल्या खात्यातून कसे काय पैसे काढले गेले? याबाबत कर्मचार्यांना काहीच उमगेना. मग नगरपरिषदेत चौकशी केली असता, त्या दोन मध्यस्थांनी व साहेबांनी गप्प रहा याबाबत कुणालाच काही सांगू नका असा दम काही कर्मचार्यांना दिला असल्याचे समजते.
यातूनच संबंधित अधिकार्याच्या भ्रष्ट प्रवृत्तीचे भिंग फुटले. अन् नगरपरिषदेच्या त्या आधिकार्याने कर्मचार्यांच्या पैश्यांवर डल्ला मारला असल्याची दबक्या आवाजात चर्चा सुरू झाली. अन् या चर्चेचे लोण आता सावर्जनिक झाले आहे. ही चर्चा गुन्हा दाखल होणार इथपर्यंत सोशल मिडीयासह चौकाचौकात रंगली खरी पण अजून गुन्हा दाखल झाला नाही.