जगदंबा विद्यालयाच्या शेतीत होणार कृषी तंत्रज्ञानाचा वापर

कुळधरण/प्रतिनिधी/- कर्जत तालुक्यातील राशिन येथील श्री जगदंबा विद्यालयाच्या शेतीत आता कृषी तंत्रज्ञानाचा वापर केला जाणार आहे. त्यामुळे विद्यार्थीही कृषीवर आधारित पाठ्यमुद्दे प्रत्यक्ष अनुभूतीने अध्ययन करुन घेणार आहेत. रयत शिक्षण संस्थेच्या मॅनेजिंग कौंन्सिलचे सदस्य राजेंद्र फाळके यांनी शेतीची पाहणी करुन मुख्याध्यापक व व्यवस्थापन समितीसमवेत चर्चा केली.

रयत शिक्षण संस्थेच्या स्वावलंबी शिक्षण हेच आमचे ब्रीद या घोषवाक्याप्रमाणे संस्थेत आता शेतीविकास व प्रगत शेती तंत्रज्ञान या विषयावर भर देण्यात येत आहे. संस्थेतील ज्या शाळांना शेती उपलब्ध आहे. तेथे या दृष्टीने संस्थेने पावले टाकायला सुरुवात केली आहे. नोकरीच्या अल्पसंधी व महाराष्ट्रात होणार्‍या शेतकरी आत्महत्या यावर उपाय म्हणून येथील विद्यार्थ्यांना अभ्यासाबरोबरच शेतीची आवड व आधुनिक शेती तंत्रज्ञान अवगत व्हावे म्हणून हा उपक्रम हाती घेण्यात आला आहे.