स्कूल बस तपासणीसाठी रात्री एक वाजल्यापासून रांगा; मात्र दुपारपर्यंत अधिकारी फिरकलेच नाहीत
शालेय विद्यार्थ्यांच्या सुरक्षिततेसाठी स्कुल बसची तपासणी करुन फिटनेस प्रमाणपत्र घेणे आवश्यक आहे. ते न घेतल्यास आरटीओ दंडात्मक कारवाई बरोबरच बसही अटकावून ठेऊ शकते. मागील काही वर्षात शाळा सुरु झाल्यावर कारवाई केल्यामुळे विद्यार्थ्यांचे नुकसान होत होते. यामुळे मागील वर्षीपासून उच्च न्यायालयाच्या आदेशानूसार उन्हाळ्याच्या सुट्टीत सर्व स्कूल बस आणि व्हॅनची तपासणी करण्यात येत आहे. त्यानुसार 15 एप्रिल ते 15 जून या कालावधीत सर्व स्कूल बस आणि स्कूल व्हॅन मालकांनी वाहनांची तपासणी करून घेण्याचे आवाहन आरटीओने केले होते. आरटीओच्या आळंदी रस्त्यावरील कार्यालयात ही निःशुल्क तपासणी केली जात आहे. आतापर्यंत दीड महिन्यात सुमारे चौदाशे स्कूल बसची तपासणी करून योग्यता प्रमाणपत्र देण्यात आले आहे. मात्र आता शाळा सुरु होण्यास अवघे दोन आठवडे शिल्लक असल्याने
आळंदी रस्त्यावरील फुलेनगर येथील आरटीओ कार्यालयात स्कूल बसच्या रात्रीपासूनच तपासणीसाठी रांगा लागलेल्या आहेत. शहरात 3700 स्कूल बस आहेत. गेल्या वर्षीही तपासणी मोहीम राबविण्यात आली होती. त्या वेळी स्कूल बस चालकांकडून अत्यल्प प्रतिसाद मिळाला होता. त्यामुळे तपासणीची मुदत दोन वेळा वाढविण्यात आली होती. यंदाही मुदत वाढवून दिली जाणार की, तपासणी न करणार्‍या स्कूल बसचे परवाने रद्द करण्याचा निर्णय घेण्यात येणार हा प्रश्‍न उपस्थित होत आहे.
