पल्स पोलिओ लसीकरण मोहिमेचा लाभ घ्यावा - अभिजीत राऊत

सांगली/मुंबई, दि. 21, जानेवारी - देशामध्ये पोलिओवर मात करण्यात आज आपण यशस्वी झालो असलो तरी आपल्या देशातून पोलिओला कायमचे हद्दपार करण्यासाठी पल्स पोलिओ लसीकरण मोहिमेचा सर्व पालकांनी लाभ घ्यावा, असे आवाहन जिल्हा परिषद मुख्य कार्यकारी अधिकारी अभिजीत राऊत यांनी आज येथे केले. राष्ट्रीय पल्स पोलिओ लसीकरण मोहीम 28 जानेवारी व 11 मार्च 2018 रोजी राबवली जाणार आहे. यासंदर्भात जिल्हाधिकारी कार्यालयात आयोजित जिल्हास्तरीय समन्वय समितीच्या आढावा बैठकीत ते बोलत होते. 
राऊत म्हणाले, पोलिओ रोगाचा सर्वाधिक धोका बालकांना असतो. त्याच्यावर उपचार नसून प्रतिबंध हाच उपचार आहे. केवळ शून्य ते पाच वर्षे वयोगटातील बालकांना पोलिओ प्र तिबंधक लसीच्या ठराविक अंतराने दोन लसी दिल्यास पोलिओची बाधा होण्याची शक्यता उरत नाही. तसेच, भावी पिढ्यांवर पोलिओमुळे उद्भवणारे अपंगत्वाचे सावट कधीही पडणार नाही. या व्यापक दृष्टीकोनातून पोलिओ निर्मूलनाची मोहीम हाती घेण्यात आली आहे. तरी याचा लाभ पाच वर्षे वयोगटाखालील बालकांना मिळावा, यासाठी पालकांनी सजग राहावे, असे आवाहन त्यांनी यावेळी केले.