गुटखामुक्त रायगडसाठी पनवेल संघर्ष समितीचा संकल्प

अलिबाग, - राज्य शासनाची सक्तीची बंदी असतानाही पनवेलसह राज्यात सर्वत्र गुटखा विक्री तेजीत सुरू असल्याने व्यसनाधीनता वाढीस लागली आहे. प्रामुख्याने गुटखाच्या आहारी जाणार्यांमध्ये तरुणांचा समावेश जास्त आहे. नव्या वर्षाच्या प्रारंभीच ‘गुटखामुक्त पनवेल’, ची संकल्पना राबवून ती अमलात आणण्याचा निर्धार पनवेल संघर्ष समितीने केला आहे. अन्न व औषध प्रशासन आणि पोलिस यंत्रणेच्या सहकार्याने काही दिवसातच हा संकल्प तडीस नेण्याचा निर्धार संघर्षचे अध्यक्ष कांतीलाल कडू आणि त्यांच्या सर्व सहकार्यांनी मनावर घेतला आहे.

पनवेल शहर, महापालिका क्षेत्रासह तालुक्यातील गावोगावी, नाक्यानाक्यावर गुटख्याची बेकायदेशीर विक्री चढ्या भावाने सुरू आहे. राज्य शासनाच्या बंदी आदेशाची सर्रास पायमल्ली होत आहे. गुटखा विक्रीमुळे तरुण मोठ्या प्रमाणात कॅन्सरसारख्या महाभयानक आजाराचे बळी ठरत आहेत. याविषयी समाजात जनजागृती करून गुटखाबंदीची अंमलबजावणी करण्यासाठी पनवेल संघर्ष समितीने पाऊल उचलले आहे. रायगड जिल्हा अन्न व औषध प्रशासनाचे प्रमुख दिनेश संगत, पनवेल महापालिकेचे आयुक्त डॉ. सुधाकर शिंदे, पोलिस आयुक्त हेमंत नगराळे याशिवाय महाराष्ट्र पोलिस महासंचालकांचीही याबाबतीत मदत घेऊन उद्या सुरू होणार्या नवीन वर्षाचा संकल्प म्हणून पनवेल तालुका गुटखामुक्त करण्याचा मानस केला असल्याची माहिती कांतीलाल कडू यांनी दिली.

ज्येष्ठ समाजसेवक, महाराष्ट्र भूषण, राष्ट्रीय पुरस्कार विजेते डॉ. अभय बंग यांच्याशी कडू यांनी दोन वर्षांपूर्वी संपर्क साधला होता. डॉ. बंग यांनी चंद्रपूर जिल्हा तंबाखू मुक्त क रण्याचा संकल्प त्यावेळी केला होता. कडू यांना त्यांनी रायगड जिल्ह्यात व्यसनाधीतेला बळी पडणार्या तरुण पिढीला वाचविण्यासाठी काही ठोस कामगिरी करण्याचे सूचित केले होते. त्यांच्या निर्देशाप्रमाणे तंबाखूइतकाच भयानक असणार्या आणि त्यातही राज्य शासनाची बंदी असताना सर्रास विकल्या जाणार्‍या गुटख्याला पनवेल तालुक्यातून मूठमाती देण्याचा संकल्प संघर्ष समितीने केला असून तो तडीस नेला जाईल. पनवेल तालुक्यासोबतच ही मोहीम रायगड जिल्ह्यात सर्वत्र राबविण्याचा संघर्ष समितीचा प्रयत्न राहील. व्यसनमुक्तीचे रायगडात रेवदंडा येथे मोठे केंद्र आहे. पद्मश्री आप्पासाहेब धर्माधिकारी यांची इच्छाशक्ती असलेल्या डॉ. नानासाहेब धर्माधिकारी प्रतिष्ठानने रायगडसह देश, विदेशात व्यसनमुक्तीसाठी मोठे योगदान दिले आहे. त्यांच्या संकल्पनेनुसार रायगडातील गुटखा विक्री नेस्तनाबूत करण्यासाठी संघर्ष समितीला जे जे प्रयत्न करणे आवश्यक आहेत, ते ते करण्याची जबाबदारी खांद्यावर घेतली आहे, अशी माहिती कडू यांनी नववर्षाच्या संकल्पाविषयी प्रसारमाध्यमांना दिली.