आशियाई कबड्डी स्पर्धा : विजेत्या संघातील महाराष्ट्राच्या महिला खेळाडूंचा सत्कार

आशियाई अजिंक्यपद कबड्डी स्पर्धेतील विजेत्या भारतीय महिला संघाच्या कर्णधार अभिलाषा म्हात्रे आणि खेळाडू सायली जाधव यांचा क्रीडामंत्री विनोद तावडे यांनी आज सत्कार केला. सायली जाधव यांना राज्य शासनाच्या सेवेत सामावून घेण्यात येणार असल्याचे श्री.तावडे यांनी यावेळी सांगितले.
कर्णधार अभिलाषा म्हात्रे आणि खेळाडू सायली जाधव यांनी आज क्रीडामंत्री श्री.तावडे यांची मंत्रालयात भेट घेतली. यावेळी या दोघींना प्रत्येकी सात लाख रुपयांचा धनादेश आणि शाल देऊन श्री.तावडे यांनी सत्कार केला.

क्रीडा क्षेत्रात उल्लेखनीय कामगिरी करणाऱ्या खेळाडूंचा उचित गौरव राज्य शासन करत आहेत. विविध पुरस्कारांसाठी ऑनलाईन प्रक्रिया सुरू केली आहे, असेही श्री.तावडे यांनी सांगितले.