कुलभूषण जाधव यांच्या सुटकेसाठी आंतरराष्ट्रीय स्तरावर दबाव सुरू - सुभाष भामरे

पुणे, दि. 12, नोव्हेंबर - कुलभूषण जाधव यांची फाशी रद्द करून त्यांची सुटका व्हावी, यासाठी आंतरराष्ट्रीय स्तरावर दबाव टाकण्यात येत असल्याचे संरक्षण राज्यमंत्री डॉ. सुभाष भामरे यांनी आज येथे पत्रकारांशी बोलताना सांगितले. तसेच मुंबईतील एलफिन्स्टन रोड रेल्वे पुलाचे काम जानेवारी महिन्यात पूर्ण होईल, असा विश्‍वासही श्री. भामरे यांनी व्यक्त केला. पुरंदर विमानतळाचा अहवाल लष्कराकडे आला आहे. या संदर्भातील सूचना मुख्यमंत्री आणि संबंधिताना दिल्या असल्याचेही श्री. भामरे म्हणाले.

देशातील सर्व कँटोनमेंट बोर्ड्स येत्या काही महिन्यात हागणदारीमुक्त करावीत, अशा सूचना दिल्याचे डॉ. भामरे यांनी येथे सांगितले. पुणे कँटोन्मेंट बोर्डाला 200 वर्षे पूर्ण झाली. यानिमित्त विशेष कार्यक्रमांचे आयोजन करण्यात आले आहे. या कार्यक्रमाचे उद्घघाटन भामरे यांच्या हस्ते करण्यात आले.

पुणे कँटोन्मेंटमधील दोन रेल्वे मार्गावरील पादचारी पुलांना ना हरकत प्रमाणपत्र देण्यात आले आहे. पुलांचे बांधकाम लवकरच सुरु होईल, अशी माहितीही त्यांनी दिली. हागणदारी मुक्त झालेल्या 11 कँटोन्मेंट्सना प्रमाणपत्र देऊन गौरवण्यात आले.