राष्ट्रवादी काँग्रेस घालणार तहसीलदार कार्यालयांसमोर नोटबंदीचे वर्षश्राद्ध
भाजप - शिवसेना युती सरकारने नोटबंदी जाहीर करून 500 व 1000 रुपयांच्या नोटा चलनातून रद्द केल्या. परंतु दुर्देवाने एवढा महत्वाचा आर्थिक निर्णय घेण्याअगोदर त्यानंतर निर्माण होणार्‍या परिस्थितीची कोणतीही पुर्वतयारी न केल्याने देशभरातील करोडो नागरिकांना प्रचंड आर्थिक ताण तसेच हाल-अपेष्टांना तोंड द्यावे लागले होते. सर्वसामान्य नागरिक, शेतकरी, महिला, विद्यार्थी, युवक यांच्यासह सर्वच समाजघटकांना मोठ्या त्रासाला सामोरे जावे लागले होते. तसेच कष्टकरी, कामगार, सर्वसामान्य जनता व मोलमजुरी करणार्‍यांना मोठया प्रमाणावर हाल-अपेष्टांना सामोरे जावे लागले होते. आपले स्वतःचे हक्काचे पैसे बँकेतून काढण्यासाठी देखील तासनतास मोठमोठ्या रांगेत उभे रहावे लागले होते. अनेकांना यात आपले जीव देखील गमवावे लागले होते.
नोटबंदीच्या या निर्णयाला 8 नोव्हेंबर 2017 रोजी एक वर्ष पूर्ण होत आहे. त्यामुळे सकाळी 11 वाजता सर्व तालुक्यांच्या तहसीलदार कार्यालयांसमोर राष्ट्रवादी काँग्रेसच्या वतीने नोटबंदीचे वर्षश्राद्ध घालून आंदोलन करण्यात येणार आहे. या आंदोलनात पक्षाचे नेते, कार्यकर्ते, पदाधिकारी, शेतकरी व हितचिंतक यांनी मोठया संख्येने सहभागी व्हावे, असे आवाहनही अ‍ॅड. रविंद्र पगार यांनी केले आहे.
