दुसर्‍या टी-20 सामन्यात न्यूझीलंडची भारतावर 40 धावांनी मात

राजकोट, दि. 05, नोव्हेंबर - न्यूझीलंडने राजकोटच्या ट्वेन्टी ट्वेन्टी सामन्यात भारताचा 40 धावांनी पराभव करून तीन सामन्यांच्या मालिकेत 1-1 अशी बरोबरी साधली. त्यामुळं कर्णधार विराट कोहलीला 29 व्या वाढदिवसाची भेट मिळू शकली नाही.
या सामन्यात न्यूझीलंडने भारताला विजयासाठी 20 षटकांत 197 धावांचं लक्ष्य दिलं होतं. त्या लक्ष्याचा पाठलाग करण्याचा टीम इंडियाचा प्रयत्न अयशस्वी ठरला. न्यूझीलंडने भारताला 20 षटकांत सात बाद 156 धावांत रोखलं.  न्यूझीलंडच्या ट्रेन्ट बोल्टने 34 धावांत चार फलंदाजांना माघारी धाडून भारतीय फलंदाजीचा कणा मोडला. विराट कोहली आणि धोनीने पाचव्या विकेटसाठी केलेल्या 56 धावांच्या भागिदारीने टीम इंडियाच्या आव्हानात धुगधुगी निर्माण केली होती. पण विराट बाद झाला आणि भारताच्या  विजयाची आशा संपुष्टात आली. विराटने 42 चेंडूंत 8 चौकार आणि एका षटकारासह 65 धावांची खेळी उभारली.