नवी दिल्ली, दि. 05, नोव्हेंबर - भारताची बॅडमिंटन स्टार पीव्ही सिंधूला विमान प्रवासात इंडिगो कर्मचार्‍याच्या गैरवर्तनाचा सामना करावा लागला. ज्याविरोधात तिने जाहीरपणे नाराजी व्यक्त केली आहे. इंडिगोनेही या प्रकरणाची दखल घेत तातडीने स्पष्टीकरण दिलं आहे. 6ए 608 या विमानाने 4 नोव्हेंबर रोजी मुंबईला प्रवास करताना वाईट अनुभव होता, असं म्हणत सिंधूने नाराजी व्यक्त केली. तिने यामध्ये ग्राऊंड स्टाफ अजितेशचं नाव घेतलं आहे.
ग्राऊंड स्टाफ अजितेशने माझ्यासोबत उद्धटपणे वर्तन केलं. एअर होस्टेस सुश्री आशिमाने त्याला नीट बोलण्याचा सल्ला दिला, तर तो तिच्यावरही भडकला हे पाहून धक्का बसला. इंडिगोसारख्या प्रतिष्ठित एअरलाईन्समध्ये असे लोक काम करत असतील तर हे कंपनीची प्रतिष्ठा कमी करणारं आहे, अशा शब्दात सिंधूने राग व्यक्त केला.
