तर 15 आमदारांचा पाठिंबा मिळवून देईन : रामदास आठवले
शिवसेनेने फडणवीस सरकारचा पाठिंबा काढला, तरीही सरकार पडणार नाही, कारण 15 आमदार आणण्याची जबाबदारी मी स्वतः घेतली आहे. राज्यातील जनतेला इतक्या लवकर निवडणुका नको आहेत. जर सरकार पडलंच, तर आम्ही निवडणुकीला सामोरे जाण्यास पूर्णपणे तयार आहोत. मात्र सरकार पडणारच नाही, कारण शरद पवार हे आतून आमच्या सोबत आहेत, असा दावा रामदास आठवले यांनी अमरावतीत आयोजित पत्रकार परिषदेत केला. नारायण राणे यांनी काँग्रेस सोडण्याचा निर्णय अगदी योग्य वेळी घेतला असून फडणवीसांनी त्यांना लवकर पक्षात प्रवेश देऊन एखादं मंत्रिपद द्यावं, अशी आपली इच्छा आहे. पण जर त्यांना भाजपने प्रवेश दिला नाही तर आपण त्यांना रिपाइंमध्ये प्रवेश देण्यास तयार असल्याचंही रामदास आठवले म्हणाले.
