अंदोरीच्या पाण्याच्या टाकीला अखेर घरघर
अंदोरी हे गाव 5 हजार लोकवस्तीचे गाव आहे. मुख्य गावठाणातील रहिवासांना पाणीपुरवठा करणारी पाण्याची टाकी भरवस्तीत आहे. या टाकीला गेल्या काही वर्षांपासून तडे जाऊ लागले आहेत. सध्या टाकीचे सिमेंटचे खांब उघडे पडू लागले आहेत. बांधकाम जीर्ण झाल्यामुळे टाकीचे तुकडे ढासळू लागले आहेत. लोखंडी सळ्या मोकळ्या होत असल्याने टाकी पडण्याची भीती निर्माण झाली आहे. या टाकीच्या परिसरात हनुमान मंदिर, शॉपिंग सेंटर, शिवाय अनेक घरे आहेत. अपघाताने टाकी पडल्यास मोठ्या नुकसानीसह जीवितहानी होण्याची शक्यता आहे. त्यामुळे दिवसेंदिवस टाकीची होणारी दुरवस्था लक्षात घेऊन प्रशासनाने टाकी पाडण्याबाबत तातडीने पावले उचलावीत, अशी मागणी ग्रामस्थांमधून होऊ लागली आहे.
