मुंबईच्या लोकल ट्रेनमध्ये महिलांच्या सुरक्षेसाठी ‘पॅनिक बटन’
आता रेल्वेमध्ये महिलांच्या डब्यात इमर्जन्सी आलार्म सिस्टीम म्हणजेच पॅनिक बटन बसवले जाणार आहे. महिलांना प्रवासादरम्यान कोणतीही अडचण आली किंवा कोणताही अतिप्रसंग झाल्यास, या बटनाद्वारे संबंधित प्रशासनाला कळवू शकतात. महिलांच्या सुरक्षेच्या दृष्टीने रेल्वे प्रशासनाचे हे अत्यंत महत्त्वाचे पाऊल मानले जात आहे.
या पॅनिक बटनची चाचणी मध्य रेल्वेच्या मुंबईतील माटुंगा वर्कशॉपमध्ये घेण्यात आली असून, ट्रायल म्हणून रेल्वेच्या चार यूनिट्समध्ये लावण्यात येणार आहे. त्यानंतर रेल्वेकडून सर्व ट्रेनमध्ये महिलांच्या डब्यात पॅनिक बटन बसवण्यात येणार आहे.
हे पॅनिक बटन लाल रंगाचे असून, हे महिलांच्या प्रत्येक डब्यात बसवले जाईल. महिलांच्या डब्यात प्रत्येक दोन सीट्सच्या मधोमध हे पॅनिक बटन असेल. जर एखादी महिला अडचणीत असेल, तर तिला पॅनिक बटन दाबावे लागेल. त्यानंतर डब्याच्या बाहेरील बाजूस ऑडिओ-व्हिडीओ सिग्नल दिला जाईल, त्यामार्फत बाहेरील लोकांना आणि प्लॅटफॉर्मवरील स्टाफना याबाबत कळेल. शिवाय, ट्रेनमधील कर्मचार्‍यांनाही याची माहिती मिळेल.
