साईना नेहवाल दुसऱ्या फेरीत

नवी दिल्ली 
मलेशिया ओपन बॅडमिंटन स्पर्धेमध्ये भारताच्या साईना नेहवालने महिला एकेरीत विजयी सलामी देत दुसऱ्या फेरीत प्रवेश मिळवला. साईनाने सलामीच्या लढतीत हाँगकाँगच्या यिप पुई यिनवर २१-१२, २१-१६ अशी मात केली. ही लढत ४२ मिनिटे चालली. दुसऱ्या फेरीत साईना नेहवालची लढत दुसऱ्या मानांकित जपानच्या अकाने यामागुचीविरुद्ध होईल. पहिल्या लढतीतील विजयाने साईना पूर्णपणे तंदुरुस्त असल्याचे स्पष्ट झाले. पुरुष एकेरीत भारताच्या समीर वर्माला सलामीलाच पराभव पत्करावा लागला. इंडोनेशियाच्या टॉमी सुगिर्तोने समीरवर २१-१३, २१-५ असा विजय मिळवला. मिश्र दुहेरीत चीनच्या आठव्या मानांकित हे जिटिंग-डु युए जोडीने रोहन कपूर-कुहू गर्ग जोडीवर २१-९, २१-१० अशी मात केली.