पोलीस अधिकारीपदी निवडीबद्दल जाधव यांचा सत्कार

कोपरगाव ता. प्रतिनिधी
कर्मवीर शंकरराव काळे एज्युकेशन सोसायटीच्या सुशीलामाई काळे कला, वाणिज्य व विज्ञान महाविद्यालयातील वाणिज्य शाखेतील माजी विद्यार्थी विलास जाधव महाराष्ट्र लोकसेवा आयोगाच्या (एम. पी. एस. सी.) परीक्षेत ६१ व्या नंबरने उत्तीर्ण झाले. त्यांची पोलीस उपनिरीक्षकपदी नुकतीच निवड झाली. या निवडीबद्दल कर्मवीर शंकरराव काळे एज्युकेशन सोसायटीच्यावतीने संस्थेचे चेअरमन, माजी आ. अशोक काळे यांच्या हस्ते जाधव यांचा सत्कार करण्यात आला.  यावेळी संस्थेचे व्हा. चेअरमन छबुराव आव्हाड, विश्वस्त युवा नेते आशुतोष काळे, मानद सचिव चैताली काळे आदी उपस्थित होते. 

सत्काराला उत्तर देतांना जाधव म्हणाले, ग्रामीण भागात राहून बारावीपर्यंतचे शिक्षण कला शाखेतून घेतले. सुशिलामाई काळे कला, वाणिज्य विज्ञान महाविद्याल्यात प्रथम वर्ष वाणिज्य शाखेत प्रवेश घेऊन वाणिज्य पदवीधर झालो. पण या कार्यकाळात महाविद्यालयात स्पर्धा परीक्षेच्या मार्गदर्शनामुळे स्पर्धा परीक्षेचा अभ्यास सुरु केला आणि यश मिळाले. मिळालेले हे यश आणि शैक्षणिक भविष्य घडविण्यात सुशिलामाई काळे महाविद्यालयाचा मोठा वाटा आहे.

याप्रसंगी संस्थेचे विश्वस्त व गव्हर्निंग कौंन्सिलचे सदस्य कारभारी जाधव, कारभारी आगवन, भास्करराव आवारे, सिकंदर पटेल, ज्ञानदेव मांजरे, बाळासाहेब बारहाते, चंद्रकांत औताडे, दिलीपराव चांदगुडे, किसनराव पाडेकर, सुशीलामाई काळे कला, वाणिज्य व विज्ञान महाविद्यालयाच्या प्राचार्या डॉ. विजया गुरसळ, गौतम पब्लिक स्कूलचे प्राचार्य नूर शेख, गौतम पॉलिटेक्निक इन्स्टीट्युटचे प्राचार्य सुभाष भारती, मुख्याध्यापक देशमुख, मुख्याध्यापक गुडघे आदी उपस्थित होते. सूत्रसंचालन केशव दळवी यांनी केले.