मंदिरासमोर अचानक खड्डा! पुरातन भुयाराची शक्यता

श्रीगोंदा प्रतिनिधी  - तालुक्यातील आढळगाव येथील रोहिदास मंदिराच्या समोर अचानकपणे १० ते १५ फूट खड्डा पडला. त्यामुळे एकच खळबळ उडाली. हा खड्डा नेमका कशाचा, याविषयी मात्र तर्कवितर्क लढविले जात आहेत. याठिकाणी पुरातन काळातील भुयार असण्याची शक्यता जाणकार मंडळींनी वर्तविली. 

येथील रोहिदास महाराजांच्या मंदिरासमोर आज {दि. ४} दुपारी एकच्या सुमारास अचानकपणे जमीन खचून खड्डा पडला. त्यामुळे परिसरातील नागरिकांत घबराटीचे वातावरण निर्माण झाले होते. महसूलचे मंडलाधिकारी कळसकर, कामगार तलाठी महेंद्र काळे, कोतवाल शैलेश शिंदे आदींनी घटनास्थळी जाऊन पाहणी केली. दरम्यान, आढळगावमध्ये जुने वाडे आहेत. यापैकी एखाद्या जुन्या वाड्यातील हे भुयार असण्याची शक्यता वर्तवली जात आहे.