निळवंडे आणि वांबोरी धरणाच्या कामासाठी ५०० कोटींचा निधी उपलब्ध करणार - मुख्यमंत्री
पुण्‍यश्‍लोक अहिल्‍यादेवी होळकर शासकीय कृषी महाविद्यालयाचे भूमीपूजन मुख्यमंत्री फडणवीस यांच्या हस्ते झाले. त्यावेळी ते बोलत होते. यावेळी पालकमंत्री प्रा.राम शिंदे, कृषी राज्यमंत्री सदाभाऊ खोत, खासदार दिलीप गांधी, आमदार शिवाजीराव कर्डिले, विभागीय आयुक्त महेश झगडे, कुलगुरू डॉ.के.पी.विशवनाथा, जिल्हाधिकारी अभय महाजन, मुख्य कार्यकारी अधिकारी विश्वजीत माने, जिल्हा पोलीस अधीक्षक रंजनकुमार शर्मा आदी मान्‍यवर उपस्थित होते.
मुख्यमंत्री फडणवीस म्‍हणाले, या कृषी महाविद्यालयाच्‍या माध्‍यमातून जगातील आधुनिक तंत्रज्ञान शेतकऱ्यांच्‍या बांधापर्यत पोहोचविण्‍यास मदत होणार आहे. सर्वसामान्‍य शेतकरी कुटुंबातील मुलेही या विद्यालयात आधुनिक तंत्रज्ञान आत्‍मसात करुन आपल्‍या क्षेत्रात नवनवीन प्रयोग करतील. शेतीचे उत्‍पादन व उत्‍पन्‍न वाढण्‍यास मदत होईल. शेतकऱ्‍यांचे उत्‍पन्‍न वाढण्‍यासाठी राज्‍य शासनाने कृषी क्षेत्रामध्‍ये गुंतवणूक केली असून जलयुक्‍त शिवाराच्‍या माध्‍यमातून राज्यातील 11 हजार गावे दुष्‍काळमुक्‍त झाली आहेत. यामध्‍ये जिल्‍ह्यातील 800 गावांचा समावेश असल्याचे त्यांनी सांगितले.
