आंध्रप्रदेश व कर्नाटकच्या धर्तीवर शेतकऱ्यांच्या कर्जमाफीचा कुठलाही निधी वळविला जाणार नाही

नागपूर : शेतकऱ्यांना कर्जमाफीचा लाभ मिळावा याकरिता वित्त विभागामार्फत अतिरिक्त निधी उपलब्ध करून दिला आहे. आंध्रप्रदेश व कर्नाटकच्या धर्तीवर अनुसूचित जातीच्या उपयोजनेतून कुठलाही निधी वळविला जाणार नाही, असे सामाजिक न्याय मंत्री राजकुमार बडोले यांनी विधानसभेत माहिती दिली.
या संदर्भात 293 अन्वये मांडलेल्या प्रस्तावावर बोलत असताना श्री.बडोले म्हणाले की, मागासवर्गीय संस्थांना कर्ज देण्याबाबत 2004-05 पासून 372 संस्थांना अर्थसहाय्य करण्यात आले आहे. 73 संस्थांनी प्रकल्प उभारले व इतर संस्थांना दुसरा हप्ता देण्यात आला आहे. याबाबत नवीन नियम व नवीन नियमावली अंतिम करुन सुधारित परिपूर्ण योजना तयार करणार असल्याचेही त्यांनी सांगितले. मागासवर्गीय संस्थांचे व्यावसायिक व प्रा.लि.कंपन्याचे जे सदस्य अनुसूचित जातीतील असतील त्यांना अर्थसहाय्य करण्यात येणार आहे. या संस्थामधील मागील त्रूटी दूर करून परिपूर्ण योजना लवकरच सुरू करण्यात येणार आहे.

सामाजिक न्याय विभागामार्फत सन 2009-10 व 2013-14 या कालावधीत केलेल्या खरेदीसंदर्भात गैर व्यवहार झाला याबाबत विशेष पथक गठीत करून चौकशी केली जाणार आहे. सामाजिक न्याय विभागाअंतर्गत प्रत्येक तालुक्यामध्ये वसतिगृह सुरू करण्याबाबत कार्यवाही सुरू असल्याचेही श्री.बडोले यांनी सांगितले.