बीड, दि. 05, नोव्हेंबर - जेवण करण्यासाठी ढाब्यावर ट्रक उभे करणे ट्रक चालकाला महागात पडले असून तेवढया वेळात ट्रकमधून 75 हजारांची टूथपेस्ट चोरट्यांनी पळवली. दात पांढरे करणारी टुथपेस्ट चोरीला गेल्याने त्यांचे डोळे पांढरे होण्याची वेळ आली. हा ट्रक गोव्याहून उत्तर प्रदेशातील कानपूरकडे निघाला होता. मांजरसुंबा जवळील एका ढाब्यावर जेवण करण्यासाठी ट्रक चालक अर्जून सरबसिंग याने ट्रक थांबविला. जेवण झाल्यानंतर ट्रकचालक आणि क्लीनर तिथेच झोपी गेले. पहाटेच्या सुमारास अज्ञात चोरट्याने ट्रकच्या पाठीमागील भागातील ताडपत्री उचकून एकूण 75 हजार रुपये किमतीचे टूथपेस्टचे 175 बॉक्स चोरून नेले. सकाळी उठल्यानंतर ट्रक ड्रायव्हरला चोरी झाल्याचे लक्षात आले. याप्रक रणी नेकनूर पोलीस ठाण्यात गुन्हा नोंदविण्यात आला आहे.
