नारायण राणेंच्या पक्षत्यागानंतर काँग्रेसमध्ये राजीनाम्यांचे सत्र
श्री. राणे यांनी काल आमदारकीसह काँग्रेस सदस्यत्वाचा राजीनामा दिला. त्यांचे पुत्र माजी खासदार नीलेश राणे यांनी काँग्रेस सदस्यत्वाचा राजीनामा दिला आहे. या राजीनाम्याचे पडसाद कोकणात उमटू लागले आहेत. त्यामध्ये राजापूर तालुक्याचाही समावेश आहे. श्री. राणे यांचा राजीनामा आणि तालुक्यातील पदाधिकारी आणि कार्यकर्त्यांची भूमिका मांडण्यासाठी श्री. नागरेकर यांनी आज पत्रकार परिषद घेतली. श्री. राणे यांच्यासारख्या माजी मुख्यमंत्र्यांवर पक्षात अन्याय होऊन त्यांना सदस्यत्वाचा राजीनामा द्यावा लागत असेल तर, सर्व सर्वासामान्य कार्यकर्त्याची काय अवस्था होईल, असा प्रश्‍न उपस्थित करून श्री. नागरेकर म्हणाले की, कोकणच्या विकासाला नवा आयाम देणारे श्री. राणे यांच्यावर झालेला अन्याय कधीही खपवून घेतला जाणार नाही. त्याच्या निषेधार्थ काँग्रेस सदस्यत्वाचा आपण राजीनामा देत असल्याचे त्यांनी यावेळी सांगितले. आपल्यासोबत तालुक्यातील अनेक पदाधिकारी आणि कार्यकर्ते राजीनामा देत असल्याचेही त्यांनी यावेळी स्पष्ट केले.
