राष्ट्रीय, आंतरराष्ट्रीय पुरस्कार प्राप्त द सायलेन्स चित्रपट 6 ऑक्टोबरला महाराष्ट्रात प्रदर्शित
राष्ट्रीय पुरस्कार विजेते दिग्दर्शक गजेंद्र अहिरे दिग्दर्शित ‘द सायलेंस’ एक वास्तवदर्शी चित्रपट... चित्रपट महोत्सवांत दुष्प्रवृत्तींविरोधात लढा देण्यास प्रवृत्त करणारा चित्रपट, हा चित्रपट पाहताना उर भरून आला होता अशा अनेक भावूक प्रतिक्रिया मिळवणार्‍या या चित्रपटाचा ट्रेलर नुकताच मुंबईत एका दिमाखदार सोहोळ्याद्वारे लाँच करण्यात आला. प्रसंगी चित्रपटाच्या निर्मात्या अश्‍विनी सिधवानी, निर्माते अर्पण भुखनवाला, नवनीत हुल्लड मोरादाबादी आणि अरूण त्यागी, तर सहनिर्माते गौरीश पाठारे आणि सनी ख्नन्नाबरोबरच दिग्दर्शक गजेंद्र अहिरे यांच्यासमवेत अंजली पाटील, नागराज मंजुळे, रघुवीर यादव यांसारखे चित्रपटातील नामवंत कलाकार आणि अ‍ॅड. पूजा कुटे उपस्थित होत्या. अ‍ॅड. पूजा कुटे यांच्याकडे असणार्‍या खटल्यावर चित्रपट बनवण्यासाठी कथा-पटकथा लेखन निर्मात्या अश्‍विनी सिधवानी यांनी केले असून दिग्दर्शन आणि संवाद लेखन गजेंद्र अहिरे यांनी केले आहे. तर संगीत इंडियन ओशन बँडने दिले आहे. तर छायाचित्रदिग्दर्शन कृष्णा सोरेन यांनी केले असून संकलन मयुर हरदास यांचे आहे.
