पिंपरीच्या तरुणीने पटकावले मिस आशिया पॅसिफिक स्पर्धेचे विजेतेपद
मिस आशिया पॅसिफिक या स्पर्धेपूर्वी अशा प्रकारच्या 8 ते 10 स्पर्धांमध्ये तिने सहभाग घेतला होता. यापैकी मिस सिंहगड करंडक, फ्रेश सेस या पुणे जिल्हा पातळीवरील स्पर्धेचे टायटल तिने आपल्या नावावर केले. त्यानंतर द फिटनेस क्वीन व नॅशनल मिस ग्लोबल इंडिया, असे दोन्ही राष्ट्रीय पातळीवरील टायटलही जिंकले. या स्पर्धांमधील विजयाने शिब्राला मोठा आत्मविश्‍वास मिळवून दिला. मात्र, अद्यापही आंतरराष्ट्रीय पातळीवर देशाचे प्रतिनिधित्व करण्याची इच्छा मिस आशिया पॅसिफिक या स्पर्धेने पूर्ण केली, असे शिब्राने सांगितले.
आंतरराष्ट्रीय पातळीवर परफॉर्मन्स करताना तुम्हाला तुमच्या नावाने नव्हे तर भारताच्या नावाने तुम्हाला पारखले जाते. त्यामुळे ही स्पर्धा माझ्यासाठी खूप आव्हानात्मक होती. कारण यामुळे जबाबदारी वाढते. स्पर्धेतील प्रत्येक फेरीला अगदी विचारपूर्वक परफॉर्मन्स देत गेले. कोणतीही गोष्ट अतिरंजित वाटणार नाही याची काळजी घेतली. स्पर्धेच्या रॅम्प वॉक, टॅलेंट राऊंड, फोटोशूट प्रत्येक ठिकाणी मी हायस्कोर नोंदवला. मात्र स्पर्धेतील प्रश्‍नोत्तराचा राऊंड निर्णायक ठरला.
शिब्राला सध्या एका तेलगू चित्रपटाची ऑफर आहे. यावर मराठी चित्रपटात काम करायला आवडेल का, असे विचारल्यावर मराठी चित्रपटात नाव गाजवायला मला निश्‍चितच आनंद होईल, असेही शिब्राने सांगितले. शिब्राची आई गृहिणी असून तिचे वडील आयटी रिक्रुटमेंट फर्ममध्ये काम करतात. तर लहान बहीण सध्या दहावीला आहे. आई देखील उच्चशिक्षित असून केवळ आमच्या करिअरसाठी तिने तिचे जॉब सोडले आहे. त्यामुळे आपल्या या यशात आई व कुटुंबाचा सिंहाचा वाटा आहे. किंबहुना आईने सतत दिलेल्या प्रोत्साहनामुळेच हे यश मिळवता आले, असेही शिब्राने सांगितले.
