पुणे शहर व जिल्ह्यात पावसाची दमदार हजेरी
अवघ्या पाच दिवसांवर गणपती बाप्पाचे आगामन आले आहे. त्यातच रविवार सुट्टीचा दिवस आल्यावर तुळशीबाग, रविवार पेठ, भोहरी आळी येथे जावून खरेदी करण्याची तयारी नागरिकांनी केलीच होती. परंतू, शनिवारी (दि. 19) मध्यरात्रीपासून सुरू असलेल्या संततधार पावसाने रविवारी दिवसभर थांबायचे नावच घेतले नाही. उलट सकाळपासून पावसाचा जोर वाढल्यामुळे नागरिकांची चांगलीच तारांबळ उडाली. पावसाची संततधार, ठिकठिकाणी साचलेले पाणी आणि झाडपडीच्या घटनांमुळे नागरिकांनी सुट्टीच्या दिवशीही घरात बसणेच पसंत केले. शहरासह उपनगर भागात कोथरूड, वारजे, कात्रज, औंध, येरवडा, खडकी, हडपसर, विश्रांतवाडी, धनकवडी या भागातही झालेल्या जोरदार पावसामुळे रस्त्यांवर पाणी साचले होते.
मागील दोन महिन्यांच्या प्रदिर्घ विश्रांतीनतर जिल्ह्यातील दौंड, इंदापूर, बारामती, शिरूर, पुरंदर तालुक्यात पावसाचे आगमन झाले असून खेड, जुन्नर, आंबेगाव, मुळशी, मावळ, भोर, वेल्हे, हवेली तालुक्यातही पावासाने काल रात्रीपासून दमदार हजेरी लावली. त्यामुळे शेतकरी सुखावला आहे. भोरगिरी, भीमाशंकर परिसरात अतिवृष्टी झाली असून गेल्या 24 तासांत तब्बल 120 मीमीपेक्षाही अधिक पावासाची नोंद झाली आहे. संततधार पावसामुळे ओढे, नाले खळखळून वाहू लागले असून सर्वत्र पाणीच पाणी झाले आहे. दरम्यान, बारामतीमती तालुक्यातील खरीप हंगाम वाया गेला असून शेतकर्यांनी दुबार पेरणी न करता रब्बी हंगामाची तयारी सुरू केली आहे. त्यातच पावसाने हजेरी लावल्याने तालुक्यातील रब्बी हंगामाच्या आशा पल्लवित झाल्या आहेत. या पावसामुळे खाचारामध्ये पुन्हा पाणी साचल्याने भाताचे दमदार उत्पादन येण्याची शक्यता शेतकर्यांनी व्यक्त केली आहे. जर हा पाऊस आणखीन काही दिवस असाच बसरत राहिला तर दौंड, इंदापूर, बारामती, शिरूर, पुरंदर तालुक्यांतील पाण्याचा प्रश्न मिटेल असेही शेतकर्यांचे म्हणणे आहे.
