क्रिकेटच्या मैदानात भारत-पाक पुन्हा भिडणार!
या सामन्यात आयसीसी चॅम्पियन्स ट्रॉफीच्या अंतिम सामन्यातील पराभवाचे उट्टे भारतीय महिला क्रिकेट संघ काढेल, अशी क्रिकेटप्रेमींची अपेक्षा आहे. त्यामुळे लाखो भारतीय क्रिकेट प्रेमींनी भारतीय महिला क्रिकेटपटूंनी पाकिस्तानच्या संघाला धुळ चारावी, यासाठी प्रार्थना करत आहेत. भारत आणि पाकिस्तानच्या महिला क्रिकेट संघात 2005 ते 2017 दरम्यान 9 एकदिवसीय सामने झाले आहेत. यात पाकिस्तानला सपाटून मार खावा लागला आहे. त्यामुळे 2 जुलै रोजी होणार्‍या सामन्यात काय होईल याकडे सार्‍यांचे लक्ष लागून आहे.
सध्या मिताली राजच्या नेतृत्त्वाखाली भारतीय संघाने आयसीसीच्या या टूर्नामेंटमध्ये चमकदार कामगिरी केली आहे. मिताली राजने प्रत्येक सामन्यात संयमाने निर्णय घेतल्याने, भारतीय संघाने यश विजय मिळवला आहे. त्यामुळे आगामी सामन्यातही तिचा हाच संयम पाहायला मिळेल, अशी क्रिकेटप्रेमींना आशा आहे. याशिवाय भारताकडे झूलन गोस्वामी, हरमनप्रीत कौर, स्मृती मंधनासारखे सर्वोत्कृष्ठ खेळाडू ही भारतीय संघाची जमेची बाजू आहे. या सर्वांनी आतापर्यंत प्रत्येक सामन्यात भारताला विजय मिळवून दिला आहे.
