नवी दिल्ली, दि. 27 - खा. राजू शेट्टी यांनी बिहारचे मुख्यमंत्री नितीश कुमार यांच्या निवासस्थानी जाऊन शेतकरी आंदोलनात सहभागी होण्यासाठी निमंत्रण दिल्याचे वृत्त आहे. त्यामुळे महाराष्ट्रात सप्टेंबरमध्ये होणार्‍या शेतकरी आंदोलनात नितीश कुमारही सहभागी होणार असल्याची शक्यता वर्तवली जात आहे. 7 जुलैपासून सुरू होणारी देशव्यापी किसान यात्रेचा समारोप नितीश कुमार यांच्या उपस्थितीत होणार असल्याचे सांगितले जात आहे. मध्य प्रदेशातील मंदसौर येथून यात्रा सुरु होणार असून चंपारण येथे त्याचा समारोप होणार आहे.
राजू शेट्टी आणि नितीश कुमार यांच्या पाटण्यात झालेल्या भेटीत तब्बल तासभर शेतकर्‍यांच्या प्रश्‍नावर चर्चा झाली. त्यावेळी स्वामीनाथन आयोगाच्या शिफारशी केंद्र सरकारकडून अंमलात आणल्या गेल्या पाहिजेत यावर या दोघांचे एकमत झाले. बिहार सरकारच्या शेतकरीविषयक धोरणांचे राजू शेट्टी यांनी यावेळी कौतुक केल्याचे समजते.
