नवी दिल्ली, दि. 27 - ऑस्ट्रेलियन ओपन सुपर सिरिज बॅडमिंटन स्पर्धेचे विजेतेपद पटकावलेल्या बॅडमिंटनपटू किदम्बी श्रीकांतला भारतीय बॅडमिंटन संघटनेकडून 5 लाखांचे बक्षीस जाहीर करण्यात आले आहे. संघटनेचे अध्यक्ष हिमांता बिस्व शर्मा यांनी ही घोषणा केली. इंडोनेशिया ओपन आणि ऑस्ट्रेलिया ओपन अशा सलग दोन स्पर्धांचे विजेतेपद श्रीकांतने दोन आठवड्यांत पटकावले. श्रीकांतच्या विजयाचा आणि कामगिरीचा आम्हाला अभिमान आहे. त्याच्या कामगिरीमुळे देशाचीच मान उंचावली असून आघाडीच्या बॅडमिंटनपटूंमध्ये त्याची गणना होऊ लागली आहे. त्यासाठी त्याचे कौतुक करावेड तितके कमीच, असे शर्मा म्हणाले. तसेच, सलग तीन सुपर सिरिज स्पर्धांमध्ये अंतिम फेरी गाठल्याबद्दलही शर्मा यांनी त्याचे अभिनंदन केले.
