राष्ट्रपती निवडणूक : विरोधकांमध्ये फूट, काँग्रेसच्या नेतृत्वात 17 पक्षांची बैठक
नितीश कुमार यांनी एनडीएला पाठिंबा दिल्याने मोदींविरोधात रणनिती आखत असलेल्या काँग्रेस अध्यक्षा सोनिया गांधी आणि आरजेडी नेते लालू प्रसाद यादव यांच्या नियोजनात फूट पाडली आहे. बिहारमध्ये लालू प्रसाद यादव आणि नितीश कुमार यांचं एकत्र सरकार आहे. मात्र नितीश कुमार यांच्या या निर्णयाने लालू प्रसाद यादव यांची अडचण झाली आहे. काँग्रेसच्या नेतृत्वात 17 विरोधी पक्षांची बैठक तर होणार आहे. मात्र विरोधकांकडे राष्ट्रपती निवडणूक जिंकण्यासाठी आवश्यक संख्याबळ उरलेलं नाही. त्यामुळे विरोधक मतांची जुळवाजुळव करण्यासाठी काय करणार, त्याकडे लक्ष लागलं आहे.
एनडीएकडे राष्ट्रपती निवडणूक जिंकण्यासाठी सध्या 5 लाख 32 हजार मतं आहेत. ओडिशातील सत्ताधारी पक्ष बीजेडीनेही रामनाथ कोविंद यांच्या नावाला पाठिंबा दिला आहे. बीजेडीकडे 37 हजार 257 मतं आहेत. एनडीएला दक्षिणेकडील दोन प्रमुख पक्ष वायएसआर काँग्रेस आणि टीआरएसनेही पाठिंबा दिला आहे. तर नितीश कुमार यांची 20 हजार 779 मतंही एनडीएच्या खात्यात जमा झाले आहेत. म्हणजेच एनडीएकडे एकूण 6 लाख 29 हजार 658 मतं आहेत. तर निवडणूक जिंकण्यासाठी 5 लाख 49 हजार 422 मतांची गरज आहे. म्हणजेच एनडीएकडे बहुमतापेक्षाही जास्त मतं आहेत.
