विविध कार्यक्रमांनी अहमदनगर शहराचा स्थापना दिन उत्साहात साजरा
रसिक ग्रुपच्या पुढाकाराने शहरातील ऐतिहासिक अशा चाँदबिबी महाल(सलाबतखानाची कबर) येथे रविवारी सकाळी 7 वाजताच शहर विकासाच्या विषयांवर चर्चा करण्यासाठी चाय पे चर्चा या कार्यक्रमचे आयोजन करण्यात आले होते.रसिक ग्रुपचे अध्यक्ष जयंत येलूलकर यांच्या प्रयत्नातून आयोजित करण्यात आलेल्या या उपक्रमात शहरातील विविध राजकीय पक्षांचे नेते,पदाधिकारी व नागरिक मोठ्या संख्येने सहभागी झाले होते.सकाळी 11 वाजता बागरोजा येथे प्रतिवर्षी प्रमाणे अहमदनगर प्रेस क्लबच्या वतीने शहराचे स्थापनाकार अहमद निजाम शाह यांच्या कबरीवर फुलांची चादर अर्पण करण्याच्या कार्यक्रमाचे आयोजन करण्यात आले होते.महापौर सुरेखा कदम,आ.संग्राम जगताप,प्रेस क्लबचे प्रभारी अध्यक्ष मन्सूर शेख यांच्यासहीत इतिहास प्रेमी नागरिक यावेळी उपस्थित होते.रविवारी सायंकाळी सावेडी परिसरातील जॉगिंग पार्क येथे अभिनेत्री सोनाली कुलकर्णी, भार्गवी चिरमुले आदिंच्या मराठी हिंदी गाणी,नृत्य व कॉमेडी यावर आधारित नगर जल्लोष या विशेष संगीत-सांस्कृतिक कार्यक्रमाचे आयोजन करण्यात आले होते.या कार्यक्रमालाही नागरिकांनी मोठा प्रतिसाद दिला.तसेच जागरूक नागरिक मंच या संघटनेच्या वतीने शहराच्या 527 व्या स्थापना दिनानिमित्त संपर्क कार्यालय व सहाय्यता कक्ष सुरू करण्यात आला असून त्याचे उदघाटन जिल्हाधिकारी अभय महाजन व जिल्हा पोलीस अधिक्षक रंजनुमार शर्मा यांच्या उपस्थितीत करण्यात आले.दरम्यान सोशल क्लब संस्थेच्या वतीने स्थापना दिनाच्या पूर्व संध्येला शनिवारी अहमद निजाम शाह यांच्या बागरोजा योथील कबरीच्या परिसरात स्वच्छता अभियान राबविण्यात आले.
