बंदिजनांनी आदर्शनागरिक होण्याचा निर्धार करावा - डॉ. विजय सतबीर सिंग

मुंबई दि. 25 -  कारागृहांना सुधारगृह समजून येथून बाहेर  पडताना आपण आदर्श नागरिक म्हणून  जीवन  जगू असा निर्धार बंदिजनांनी करावा, असे मनोगत सार्वजनिक आरोग्य विभागाचे मुख्य सचिव डॉ.विजय सतबीर सिंग यांनी आज व्यक्त केले.  भायखळा कारागृहात नयन फौंडेशन फॉर परफाँर्मिंग आर्टस  या स्वयंसेवी संस्थेच्या वतीने पुरुष व महिला बंदिजनांच्या मनोरंजनासाठी आयोजित संगीत कार्यक्रमांत ते प्रमुख पाहुणे म्हणून बोलत होते. 
डॉ. सिंग पुढे  म्हणाले की, बंदिजनांनी कायमचे बंदिजीवन न जगता, येथून बाहेर पडून स्वता:च्या पायावर उभे रहावे आणि आदर्श नागरिक म्हणून आपल्या कुटुंबासह जीवन  व्यतित करावे तसेच राष्ट्र उभारणीच्या कार्यात सहभागी व्हावे.
याप्रंसगी बोलताना माहिती संचालक देवेंद्र भुजबळ म्हणाले की, कारागृहातील बंदिजनांनी कारागृह म्हणजे आपल्याकडून झालेल्या चुका सुधारण्याची संधी समजून  येथील कालावधित विविध कला, व्यवसाय अवगत करुन सन्मान्य जीवन जगण्यासाठी प्रेरित व्हावे.
कार्यक्रमाचे प्रास्ताविक भायखळा कारागृहाचे अधिक्षक चंद्रमणी इंदूरकर यांनी  तर आभार प्रदर्शन तानाजी घरबुडवे, वरिष्ठ तुरुंगाधिकारी यांनी केले. नयन फौंडेशन फॉर परफाँर्मिंग आर्टस या संस्थेच्या वतीने आयोजित केलेल्या अंध गायक ,गायिका, वादकांच्या संगीत कार्यक्रमामुळे जवळपास तीन तास बंदिजनांच्या चेहर्‍यावर हसू फुलले . यावेळी ऑक्टोपॅडवर  शिवाजी भोसाडे , ढोलकीवर जयेश बनिया, तर गायिका सुजाता चव्हाण, गायक सुहास कर्णिंक, विशाल कटारिया यांनी सहभाग घेतला. प्रख्यात गायक सुनील नायर, मिमिक्री  कलाकार राजदिप यांनीही सादरीकरण केले.अंध सूत्रसंचालक बुध्दघोष यांनी बहारदारपणे सूत्रसंचालन केले.या कार्यक्रमांत बंदिजनांनीही  आपली कला सादर केली.
या प्रसंगी समाजसेविका फिरोजा अब्राहम,बिना भगत,नयन फौंडेशन फॉर परफाँर्मिंग आर्टस्च्या संयोजिका नैना कुटप्पन, एअर इंडियाचे सहायक व्यवस्थापक अतुल पंचभाई, केईएमचे डीन डॉ. रत्नेश शिंदे,शास्त्रज्ञ श्रीमती निकम आदी मान्यवर उपस्थित होते.