मिरजजवळ मोटार ऊस ट्रॉलीत घुसून 3 ठार
अपघातातील मोटार (एमएच 10 एजी 1621) कोल्हापूरहून अंकलीत आल्यानंतर मिरजमार्गे बेडगला निघाली होती. मिरजेत मगदूम मळ्याजवळ रस्त्याकडेला ऊसाने भरलेली ट्रॉली थांबली होती. भरधाव मोटारीची ट्रॉलीला जोरदार धडक बसली. मोटार ट्रॉलीत घुसली. धडक इतकी वेगवान होती, की मोटारीचा चक्काचूर झाला. त्यात हे तिघे जागीच ठार झाले. चौघेही बंगळूरमध्ये सोन्या-चांदीच्या दागिन्यांचा व्यापार करतात. आठ दिवसांच्या सुट्टीसाठी सर्वजण गावाकडे आले होते. चौघेही गणपतीपुळ्याला गेले होते. तेथे दोन दिवस मुक्काम करुन काल सायंकाळी गावाकडे येण्यास निघाले. परतीचा प्रवास संपण्यास काही किलोमीटर बाकी असतानाच अपघात झाला. त्यात तिघांना प्राण गमवावे लागले. या अपघातामुळे मिरज-कोल्हापूर रस्त्यावरील वाहतूक तासभर ठप्प झाली. मोटारीने जोरदार धडक दिल्यानंतर ट्रॉली काही अंतरावर फरफटत जाऊन रस्त्यावर आडवी उभी राहिली. यामुळे दोन्ही बाजूच्या वाहनांची कोंडी झाली. वाहनांच्या लांबच लांब रांगा लागल्या. काही वेळातच पोलिस घटनास्थळी आले. पोलिस निरिक्षक राजू मोरे आणि इतर पोलिसांनी ऊसाच्या ट्रॉलीत अडकलेली मोटार बाहेर काढली. त्यानंतर मोटारीतील मृतदेह बाहेर काढले. अपघातात गंभीर जखमी झालेल्या उदय कांबळेला 108 क्रमांकाच्या रुग्णवाहिकेतून मिरजेत खासगी रुग्णालयात दाखल करण्यात आले. येथील सिव्हील हॉस्पिटलमध्ये तिघांचे शवविच्छेदन करण्यात आले. मृत नंदकुमार आणि उदय पाटील यांच्यावर दुपारी बेडग येथे अंत्यसंस्कार करण्यात आले, दीपक जाधव यांचा मृतदेह साळशिंगे येथे पाठवण्यात आला.
