मंत्रिपद द्या, नाहीतर राजकीय संन्यास...भाऊसाहेब फुंडकरांच्या इशार्याने मुख्यमंत्री पेचात!
खडसे यांचा राजीनामा हा भाजपमधील बहुजन नेतृत्वाविरुद्ध कट असल्याचा विखारी प्रचार खडसे समर्थकांनी चालवला आहे. या पार्श्वभूमीवर फुंडकरांनी खरोखरच पक्षाला रामराम ठोकला तर या विखारी प्रचाराला अधिकच बळ मिळेल, अशी भीती फडणवीस यांना वाटतेय. राज्यात स्थानिक स्वराज्य संस्थांच्या निवडणुका येत्या सात-आठ महिन्यांत होणार आहेत. अशा वेळेेस फुंडकरांसारख्या ज्येष्ठ नेत्याचा संन्यास भाजपला भारी पडू शकतो.
राजकीय पेचाचे अन्य कंगोरे : पश्चिम विदर्भ पट्ट्यात भाजपने डॉ. रणजित पाटील आणि प्रवीण पोटे या या दोघांनाच मंत्रिपदे दिली आहेत. हे दोघेही विधान परिषदेचे सदस्य आहेत. उलट विधानसभेवर अनेकदा निवडून आलेले चैनसुख संचेती, डॉ. संजय कुटे, गोवर्धन शर्मा यांच्यासारख्या ज्येष्ठ नेत्यांना डावलण्यात आले. पक्षात कनिष्ठ असलेल्या नेत्यांना महत्त्वाची मंत्रिपदे मिळाल्याने पूर्व विदर्भातील मुख्यमंत्र्यांना या भागातील मजबूत नेतृत्व नको आहे, अशी चर्चा पश्चिम विदर्भात रंगली आहे. मात्र, याच पट्ट्यात भाजपचे माजी प्रदेशाध्यक्ष, आणि विधान परिषदेतील माजी विरोधी पक्षनेते फुंडकर यांना पहिल्यांदाच कॅबिनेट मंत्रिपद मिळणे अपेक्षित होते. आता फुंडकरांना मंत्री केले तर बुलडाणा जिल्ह्यातीलच डॉ. कुटे यांना मंत्रिपद मिळणे कठीण दिसते. कुटे मुख्यमंत्र्यांचे निकटवर्तीय असल्याने त्यांना टाळायचे कसे, असा पक्षासमोर प्रश्न आहे.
रशिया दौर्यापूर्वी विस्तार : मुख्यमंत्री 10 जुलैपासून रशियाच्या दौर्यावर जात आहेत. त्यापूर्वी हा विस्तार केला जाईल. 8 जुलैस विधान परिषदेचे विशेष अधिवेशन आयोजित करण्यात आले असून त्यात सभापतींची निवड करण्यात येणार आहे. याच दिवशी विस्तार केला जाण्याची शक्यता आहे.
पक्ष सोडणार नाही : मंत्रिपदासाठी आपण कोणताही इशारा भाजप किंवा मुख्यमंत्र्यांना दिलेला नाही. आजवर आयुष्य ज्या पक्षात काढले तो पक्ष आता आयुष्याच्या अखेरच्या टप्प्यात कशाला सोडणार? मला मंत्री केले नाही तरी मी भाजपतच राहीन.
