नवी दिल्ली, दि. 29 - भारताच्या प्रशिक्षकपदासाठी राहुल द्रविड योग्य असून त्याच्यामध्ये प्रशिक्षकाची पात्रता आहे, असे मत ऑस्ट्रेलियाचा स्टार खेळाडू शेन वॉट्सनने व्यक्त केले आहे. अगोदरपासूनच द्रविडच्या पात्रतेवर कसलीही शंका नाही. राजस्थान रॉयल्समध्ये कर्णधार आणि प्रशिक्षकपदाची जबाबदारीही द्रविडने यशस्वीपणे सांभाळली आहे. त्या काळात मलाही द्रविडसोबत खेळताना अनेक नवीन गोष्टी शिकायला मिळाल्या, अशा शब्दात वॉट्सनने प्रशिक्षकपदासाठी द्रविडचे समर्थन केले आहे. द्रविडकडे भारताच्या प्रशिक्षकपदाची धुरा दिल्यास ती जबाबदारी तो नक्कीच यशस्वीपणे सांभाळेल यात कसलीही शंका नाही. आयपीएलमधून कर्णधार म्हणून समो आलेला विराट कोहली आणि द्रविड दोघे मिळून संघासाठी नक्कीच महत्वपूर्ण ठरतील. द्रविड एक व्यक्ती म्हणून देखील अत्यंत चांगला आहे. द्रविडमध्ये युवा खेळाडूंना समजून मार्गदर्शन करण्याची कला आहे, असे वॉट्सनने सांगितले.
द्रविडची अंडर-19 भारतीय संघाच्या प्रशिक्षकपदी नियुक्ती करण्यात आली होती. या विश्‍वचषकात भारतीय संघाने अंतिम फेरीत धडक मारली होती. त्यामुळे द्रविडसाठी अनेक दिग्गज खेळाडूंनी समर्थन केले आहे. भारताचे माजी कर्णधार सुनील गावसकर, हरभजन सिंह यांच्यासह अनेकांनी द्रविडच्या नावाचे समर्थन केले आहे. भारतीय संघ लवकरच अनेक महत्त्वाच्या दौ-यांवर जाणार आहे. डिसेंबर 2016 पर्यंत भारत वेस्ट इंडीज, न्यूझीलंड आणि इग्लंडविरुद्ध कसोटी मालिका खेळणार आहे.
