मुबंई उच्च न्यायालयात खडसे-दाऊद संभाषण प्रकरणी हॅकरची याचिका

मुंबर्ई, दि. 29 - महसूलमंत्री खडसे यांच्या मोबाईल क्रमांकावरून थेट दाऊद इब्राहिमच्या कराचीतील मोबाईल क्रमांकावर कॉल गेल्याच्या प्रकरणी बडोद्याचा इथिकल हॅकर मनिष भंगाळे याने मुंबई उच्च न्यायालयात याचिका दाखल केली आहे. त्यामध्ये त्याने खडसे यांना आलेल्या फोनकॉल्स डिटेल्सची सीबीआयमार्फात चौकशी करण्यात यावी अशी प्रमुख मागणी केली आहे. त्यामुळे दाऊद फोन कॉलप्रकरणात खडसे यांची डोकेदुखी पुन्हा वाढली आहे. 
सबळ इलेक्ट्रॉनिक पुरावे असतानाही मुंबई पोलिसांनी खडसेंविरूद्ध कोणतीही कारवाई केली नसल्याचा आरोप मनीष भंगाळे याने केला आहे. मनीषने 18 मे रोजी

दाऊदच्या कराचीतील घराच्या दूरध्वनीचे कॉल डिटेल्स मुंबई पोलिसांना दिले आहेत. मी दिलेल्या माहितीतून समोर दिसून येत असलेल्या गुन्ह्याबद्दल कोणतीही तक्रार दाखल करण्यात आलेली नाही. उलट काही लोक माझ्याकडील इलेक्ट्रॉनिक पुरावे नष्ट करण्याचा प्रयत्न करण्याचा तसेच माझे ई-मेल्स डिलीट करण्याचा प्रयत्न करत आहेत‘, असे मनीषने म्हटले आहे.
दरम्यान, यापुर्वीचं अंडरवर्ल्ड डॉन दाऊद इब्राहिमच्या घरातून फोन आल्याच्या प्रकरणात महसूल मंत्री एकनाथ खडसे यांना मुंबई पोलिसांच्या गुन्हे शाखेने क्लीनचीट दिलेला आहे. सप्टेंबर 2015 ते एप्रिल 2016 या कालावधीत 9423073667 या क्रमांकावर कोणताही कॉल आला नाही. तसेच या क्रमांकावरून कोणताही कॉल करण्यात आलेला नसल्याचे मुंबई पोलीस दलातील सहआयुक्त अतुलचंद्र कुलकर्णी यांनी स्पष्ट केले होते.
मुंबई पोलिसांनी खडसे यांना क्लिन चीट देण्यात घाई केल्याचेही तो म्हणाला. मुंबई उच्च न्यायालयाचा सध्या सुटीचा कालावधी आहे. मात्र आपल्या जीविताला धोका असून याप्रकरणी तातडीने सुनावणी करण्याची मागणीही मनीषने केली आहे. देशहिताचा विचार करून मी माझे भविष्य, माझे कुटुंबिय आणि माझा स्वत:चा जीव पणाला लावून हे प्रकरण समोर आणले आहे.‘ असे भंगाळे म्हणाला. भंगाळेच्या याचिकेवर मुंबई उच्च न्यायालयात सोमवारी सुनावणी होण्याची शक्यता व्यक्त करण्यात येत आहे.