‘मास्टर्स चेस’मध्ये नगरचा शादरूल ज्युनिअर चॅम्पियन

 अहमदनगर । प्रतिनिधी । 08 - कतार येथे झालेल्या मास्टर्स चेस स्पर्धेत येथील शादरूल गागरे याने ज्युनिअर चॅम्पियनशीप मिळविली. या स्पर्धेत जगातील प्रथम क्रमांकाचा खेळाडू मॅक्सन कार्लसन हा सिनिअर ग्रुपमध्ये चॅम्पियन ठरला. कतार मास्टर्स ही जगातील सर्वांत मोठी ओपन ग्रॅँड स्पर्धा असून, या स्पर्धेत विविध देशातील टॉपचे स्पर्धक सहभागी होतात. शादरूल याला जिल्हा बुद्धिबळ असोसिएशनचे अध्यक्ष व शांतीकुमारजी फिरोदिया फौंडेशनचे चीफ ट्रस्टी नरेंद्र फिरोदिया यांचे विशेष सहकार्य लाभले. फिरोदिया यांनी नगर येथे आयोजित केलेल्या प्रशिक्षण शिबिरात शादरूल याला ग्रँड मास्टरकडून प्रशिक्षण देण्यात आले होते. कतारच्या स्पर्धेत शादरूल याने पहिल्या डावात जगातील महान ग्रँडमास्टर व्ही. ई. (चीन) याचा पराभव केला तर रशियाचा ग्रँड मास्टर खैरुद्दीन इद्दार याचा 9 व्या डावात पराभव केला. शादरूलने 9 व्या डावात 5 गुण मिळवून चॅम्पियनशीप मिळविली. या स्पर्धेत त्याचे रेटिंग 27 ने वाढून 2497 झाले आहे. आता शादरूल याला ग्रॅँड मास्टर होण्यासाठी तीन रेटिंगची गरज आहे. त्यासाठी त्याला एक स्पर्धा खेळावी लागणार आहे.