वाळू माफियांच्या 40 बोटी जिलेटीनने उडवल्या; 2 कोटींचे नुकसान
पंढरपूर, 23 - वाळू माफियांना चाप बसवण्यासाठी इंदापूर परिसरात बारामतीच्या प्रांत अधिका-यांनी मोठी कारवाई केली. उजनीतल्या वाळू माफियांचे कंबरडे मोडून काढत तब्बल 2 कोटी रूपयांच्या वाळू काढण्याच्या 40 महागड्या बोटी जिलेटीन सहाय्याने उद्ध्वस्त करून टाकल्या आहेत. या ठिकाणी बारामती प्रांतधिकारांनी छापा टाकून वाळू माफियांचा अड्डा उद्ध्वस्त केला. तसेच 10 बोटीही जप्त करण्यात आल्या आहेत.
बारामती येथील प्रांत अधिकारी संतोष जाधव यांच्या पथकाने डाळज नंबर 1 आणि करमाळा तालुक्यातील कात्रज येथील या माफियांच्या अड्ड्यावर धाड टाकून पाण्यात वाळू उपसा करीत असलेल्या 40 बोटी थेट स्फोट करून उडवून दिल्या आणि पाण्यात बुडवून टाकल्या. जिल्हाधिकारी तुकाराम मुंढे यांच्या अंगावर वाळू वाहतुकीचा ट्रक घालून जीवे मारण्याचा प्रयत्न केल्याची घटना ताजी असतानाच गुरुवारी (दि. 21) रात्री नऊच्या सुमारास गारअकोले येथे अवैध वाळू वाहतुकीच्या वाहनांवर कारवाई करताना महसूल पथकाला कारमधून आलेल्या चार ते पाचजणांनी शिवीगाळ करत धमकावल्याचा प्रकार घडला. तसेच पथकाच्या सरकारी वाहनाची चावीही काढून घेण्यापर्यंत मजल मारली.
