ऐन हळदीच्या दिवशी नवरदेवाचा मृतदेह आढळला

कोपरगाव ता. प्रतिनिधी - येथील युवकाचा उद्या {दि. ६ } लग्न आहे. काल {दि. ५} त्याला हळद लागणार होती. मात्र दुर्दैवाने याचदिवशी या युवकाचा येथील एका विहिरीत मृतदेह आढळला. सतिष वेणुनाथ वाकचौरे {रा. ब्राम्हणगांव टाकळी} असे या युवकाचे नाव आहे. दि. २ मे पासून त्याच्या दुचाकीसह {क्र. एम. एच. १७ ए. एच. ६२३५} तो बेपत्ता झाला होता. 

महालगाव येथील मुलीशी या आज {दि. ६} ठरल्याप्रमाणे विवाह होणार होता. बेपत्ता झाल्यानंतर आईवडिल आणि नातेवाईकांनी त्याचा शोध घेतला. मात्र तो मिळून न आल्याने पोलिस ठाण्यात फिर्याद देण्यात आली. कालपासून या युवकाचा फोटो सोशल मिडियावर व्हायरल करुन तो आढळल्यास संपर्क साधण्याचे आवाहन करण्यात आले होते. मात्र आज अंगाला हळद लावण्यापूर्वीच त्याचा मृतदेह चांदरवस्तीजवळील विहिरीत आढळून आला. त्यामुळे परिसरात प्रचंड खळबळ उडाली. या घटनेबद्दल सर्वत्र हळहळ व्यक्त करण्यात येत आहे. आईवडिललांचा तो एकुलता एक मुलगा होता. संजीवनी कारखान्यात तो नोकरीस होता. त्याच्या अकाली निधनाने वाकचौरे कुटुंबावर दुःखाचा मोठा डोंगर कोसळला आहे.