आंबा महोत्सव स्टॉल्सना आग; 50 स्टॉल्स जळून खाक

पुणे,  - मार्केटयार्ड परिसरात असलेल्या पणन मंडळाच्या आंबा महोत्सव स्टॉल्सना आज दुपारी आग लागली. यामध्ये 50 ते 60 स्टॉल्स जाळून खाक झाले आहेत. पणन मंडळाकडून दरवर्षी आंबा महोत्सव भरवण्यात येतो.कोकणातील शेतकरी आपले आंबे घेऊन येथे येत असतात. पंधरा दिवसांपूर्वी या आंबा महोत्सवाला सुरुवात झाली होती. यंदा 60 पेक्षा जास्त स्टॉल्स या महोत्सवात लावण्यात आले होते. आज दुपारी साडेबाराच्या सुमारास या स्टॉल्सना आग लागली. आगीची वर्दी मिळताच अग्निशमन दलाच्या 4 गाड्या घटनास्थळी पोहोचल्या. दरम्यान, ही आग विझवण्यात अग्निशमन दलाला यश आले असून आगीचे प्रमाण जास्त असल्याने आंब्यांचे मोठ्या प्रमाणात नुकसान झाले आहे. आगीचे कारण अद्याप समजू शकलेले नाही.