पिंपळवाडी’च्या विद्यार्थ्याला अमानुष मारहाण

कुळधरण: कर्जत तालुक्यातील पिंपळवाडी येथे जिल्हा परिषद शाळेतील शिक्षकाने दुसरीत शिकणाऱ्या विद्यार्थ्याला गणित चुकल्याच्या रागातून अमानुष मारहाण केली. यात या विद्यार्थ्याच्या टाळूला गंभीर दुखापत झाली आहे. त्याला उपचारासाठी पुण्यातील रुबी हॉस्पिटलमध्ये दाखल करण्यात आले आहे. मंगळवारी (दि.१०) सकाळी अकराच्या सुमारास हा प्रकार घडला. कुळधरणनजिकच्या पिंपळवाडी येथील रोहन दत्तात्रय जंजिरे या विद्यार्थ्याला ही अमानुष मारहाण झाली. या घटनेमुळे पालकांकडून संतप्त भावना व्यक्त होत आहे. श्वास घेण्यात अडचणी येत असल्याची माहिती रोहनचे वडील दत्तात्रय जंजिरे यांनी दिली. शिक्षण विभागाने या शिक्षकांवर निलंबनाची कारवाई केली आहे. रोहन सध्या रुबी हॉस्पिटलमध्ये मृत्यूशी झुंज देत आहे. उपचाराला प्रतिसाद देत असला तरी त्याची प्रकृती खालावलेली आहे.रोहन सध्या असह्य वेदना सोसत आहे.राज्य शासनाने अत्याधुनिक उपचारासह विशेष डॉक्टरांच्या पथकाकडुन उपचार देण्याची व्यवस्था करणे गरजेचे आहे.रोहनची कौटुंबिक परिस्थिती पाहता रुबी हॉस्पिटलचा खर्च पेलवणे कठीण जात आहे.शासन तसेच सामाजिक स्तरातुन जसे शक्य होईल तशा स्वरूपात तातडीच्या मदतीची कुटुंबाला गरज आहे.