उच्चशिक्षित तरुणाने गळफास घेऊन केली आत्महत्या

पारनेर/ प्रतिनिधी/- पारनेर तालुक्यातील कासारे येथील बाबुनाथ मालूजी दातीर( वय २७ वर्षे) या उच्चशिक्षित तरुणाने आपल्या राहत्या घरी गळफास घेऊन आत्महत्या केली.बाबूनाथ मालुजी दातीर यांचे एम.सी.ए पर्यंतचे शिक्षण झाले होते. तो पुणे येथे खाजगी कंपनीत काम करत होता. सध्या होळीच्या सणा निमित्ताने तो दोन दिवसांपूर्वी आपल्या गावाला आला होता. गुरुवार दि.१ मार्च रोजी त्याने आपल्या गावातील सार्वजनिक होळी मध्ये सहभाग नोंदवला. तसेच त्याठिकाणी लेझीम देखील खेळला. घरी आल्यानंतर त्यांनी रात्री जेवण करून आई वडिलांबरोबर गप्पा मारल्या साडेनऊच्या सुमारास शेजारील खोलीत झोपण्यासाठी गेला. 

दुसऱ्या दिवशी पहाटे ५:३० वा. त्याची आई लताबाई दातीर या उठल्यानंतर अंगणातील साफसफाई करत होत्या. मोटारसायकल अंगणामध्ये असल्याने त्यांनी ती बाहेर काढण्यासाठी बाबूनाथला आवाज दिला. परंतु त्याने प्रतिसाद न आल्याने त्यांनी दरवाजा ढकलला तर तो उघडाच होता. आत जाऊन पाहिले तर बाबूनाथ यांनी घरातील अँगलला गळफास घेतल्याचं पाहिल्याने त्यांनी तिथेच हंबरडा फोडला. आवाज ऐकून घरातील वडील व शेजारील नातेवाईक धावून आले. त्यानंतर त्यांनी त्याची कल्पना टाकळी टोकेश्वर पोलिस स्टेशनला दिली. पोलिस घटना स्थळी आले त्यानंतर टाकळी टोकेश्वर ग्रामीण रुग्णालयात आणण्यात आले . धूलिवंदनाची सुट्टी असल्याने नगरहून डॉक्टर येण्यास उशीर झाला व नंतर पोस्टमॉर्टम करून नंतर अंत्यविधी कासारे येथे करण्यात आला.