ध्वजारोहणाचा मुख्य शासकीय कार्यक्रम पालकमंत्र्यांच्या हस्ते

प्रजासत्ताक दिनाचा ६८ व्या वर्धापनदिनानिमित्त मुख्य शासकीय कार्यक्रम येथील पोलीस मुख्यालय मैदानावर होणार असून पालकमंत्री प्रा. राम शिंदे यांच्या हस्ते सकाळी सव्वानऊ वाजता ध्वजारोहण होणार आहे. अशी माहिती जिल्हाधिकाऱ्यांनी दिली. प्रजासत्ताक दिनासाठी सर्व यंत्रणांनी त्यांना नेमून दिलेली जबाबदारी गांभीर्याने आणि वेळेवर पार पाडण्याच्या सूचना जिल्हाधिकारी अभय महाजन यांनी दिल्या. जिल्हाधिकारी कार्यालय सभागृहात महाजन यांनी विविध यंत्रणांची प्रजासत्ताक दिनाच्या पार्श्वभूमीवर आढावा बैठक घेतली. यावेळी उपजिल्हाधिकारी अरुण आनंदकर, तहसीलदार गणेश मरकड यांच्यासह विविध यंत्रणांचे प्रमुख उपस्थित होते.
ध्वजारोहणाचा मुख्य शासकीय कार्यक्रम पोलीस मुख्यालय मैदानावर होणार आहे. हा कार्यक्रम सकाळी सव्वानऊ वाजता होणार असल्याने जास्तीत जास्त व्यक्तींना या मुख्य शासकीय समारंभात सहभागी होता यावे, यासाठी या दिवशी सकाळी 8-30 ते सकाळी 10 वाजेच्या दरम्यान ध्वजारोहणाचा किंवा इतर कोणताही शासकीय किंवा अशासकीय कार्यक्रम आयोजित करण्यात येऊ नयेत. सदर कार्यक्रम सकाळी 8-30 पूर्वी किंवा सकाळी 10 वाजेनंतर आयोजित करण्यात यावेत, असे प्रशासनाने स्पष्ट केले आहे.

प्रजासत्ताक दिनी शालेय मुलांचे सांस्कृतिक कार्यक्रम, मुख्य संचलनामध्ये पोलीस, गृहरक्षक दल, राष्ट्रीय छात्र सेना, राष्ट्रीय सेवा योजना, स्काऊट आणि गाईड आदींचे संचलन होणार असून विविध शासकीय योजनांची माहिती देणारे चित्ररथही यात सहभागी होणार आहेत. याबाबत, संबंधित सर्व यंत्रणांनी त्यांना दिलेली जबाबदारी बिनचूक पार पाडण्याचे निर्देश त्यांनी दिले.