राज्य शासनाच्या पाठपुराव्याला यश; उडीद खरेदीसाठी २० जानेवारीपर्यंत मुदतवाढ

खरीप 2017 मधील उडदाच्या वाढीव प्रमाणातील खरेदीसाठी राज्य शासनाने केंद्राकडे केलेल्या पाठपुराव्याला यश आले आहे. राज्य शासनाने केलेल्या विनंतीनुसार या आधी 31 डिसेंबर व 12 जानेवारी यानंतर आता 20 जानेवारी अशी तिसरी मुदतवाढ केंद्राने दिली आहे,अशी माहिती पणनमंत्री सुभाष देशमुख यांनी दिली.उडदाच्या आधारभूत किमतीनुसार खरेदी दि. 20 जानेवारीपर्यंत करता येईल. यासंदर्भात केंद्रीय कृषी विभागाकडून मंजुरीचे पत्र आज प्राप्त झाले, अशी माहिती पणनमंत्री सुभाष देशमुख यांनी दिली आहे.
राज्य शासनाने उडीद खरेदीसाठी मुदतवाढ मिळण्याबाबत सातत्याने पाठपुरावा केला. त्याला केंद्र शासनाने सकारात्मक प्रतिसाद दिला आहे. केंद्र शासनाने उडदाच्या वाढीव खरेदीसाठी 6.500 हजार मेट्रिक टनापर्यंत मंजुरी दिली असून उडीद आधारभूत किंमतीत खरेदीसाठी 20 जानेवारीपर्यंत मुदतवाढ दिली आहे. यासंदर्भात केंद्रीय कृषी मंत्रालयाने नाफेड, एसएफएसी आणि एफसीआयच्या अधिकाऱ्यांना पत्राद्वारे आज कळविले आहे. त्याची प्रत पणन विभागाचे प्रधान सचिव यांनाही देण्यात आली आहे.