अशोक कारखान्याचे 6 कोटी 5 लाख रुपये बँकेत वर्ग - राऊत
यासंदर्भात माहिती देताना श्री.राऊत यांनी सांगितले की, अशोक कारखान्याचे मार्गदर्शक भानुदास मुरकुटे यांनी 61 व्या बॉयलर अग्निप्रदिपन समारंभात सन 2016-17 च्या गळीतास आलेल्या ऊसाचे प्रति टन रुपये 285.51 प्रमाणे अदा करण्याचे जाहिर केले होते, त्यानुसार सभासद, कार्यक्षेत्रातील व कार्यक्षेत्राबाहेरील ऊस उत्पादकांचे 3 कोटी 76 लाख इतकी रक्कम बुधवार दिनांक 18 ऑक्टोबर रोजी संबंधितांच्या बँक खाती वर्ग करण्यात आली आहे. मागील वर्षाच्या गळीत हंगामात गाळप केलेल्या 1,31,627 मे.टन ऊसास यापूर्वी रुपये 2257.67 प्रमाणे व उर्वरित अदा केलेली रक्कम रुपये 285.51 मिळून शेतकर्‍यांना टनामागे रुपये 2543.18 प्रमाणे अदा करण्यात आल्याचे श्री.राऊत यांनी सांगितले. तसेच अशोक साखर कारखान्याच्या सभासद व बिगर सभासद यांचे जमा ठेवीवरील व्याजाची रक्कम रुपये 1 कोटी 15 लाख रुपये आणि कामगारांच्या बोनसची रक्कम रुपये 1 कोटी 14 लाख देखील संबंधितांच्या बँकखात्यात वर्ग करण्यात आली आहे. सभासद व ऊस उत्पादकांच्या सदरच्या पेमेंटची बिले संबंधितांना कारखान्याच्या शेतकी विभागाच्या कर्मचार्‍यांमार्फत पोहोच केली जाणार असल्याची माहिती श्री. राऊत यांनी यावेळी दिली.
