दगडूशेठ गणपती ब्रह्मणस्पती मंदिरात थाटात विराजमान
यावेळी ट्रस्टचे अध्यक्ष अशोक गोडसे, हेमंत रासने, महेश सूर्यवंशी, सुनिल रासने, माणिक चव्हाण यांसह कार्यकर्ते मोठया संख्येने उपस्थित होते. मुख्य मंदिरापासून सकाळी 8.45 वाजता श्रीं च्या आगमन मिरवणुकीला प्रारंभ झाला. नव्याने साकारलेल्या सुमारे 40 किलो सोन्याचे दागिने परिधान केलेली श्रीं ची विलोभनीय मूर्ती डोळ्यात साठविण्यासोबतच दर्शनासाठी भक्तांनी चौका-चौकात गर्दी केली. मंदिरापासून निघालेल्या मिरवणुकीचा समारोप तांबडी जोगेश्‍वरी मंदिर, अप्पा बळवंत चौक, नगरकर तालीम चौक, शनिपार चौक, टिळक पुतळा मंडई मार्गे उत्सव मंडपात झाला. मिरवणुकीमध्ये नगारा, मानिनी हे महिलांचे ढोल-ताशा पथक, दरबार बँड, प्रभात बँड सहभागी झाले होते. मुख्य पूजा मिलींद राहुरकर गुरुजी यांच्या पौरोहित्याखाली झाली.
अशोक गोडसे म्हणाले, ग्वेदामध्ये आणि मुद्गल पुराणात गणेशाचा ब्रह्मणस्पती म्हणून प्रथम उल्लेख करण्यात आला आहे. त्यामुळे देवांचे अधिपती असलेल्या गणरायाला विराजमान होण्याकरीता नागर, द्राविड आणि वेसर शैलीतील मंदिरांप्रमाणे गाणपत्य शैलीचे आगळेवेगळे मंदिर यंदा साकारण्यात आले आहे. ब्रह्मणस्पती मंदिराचा आकार 111 बाय 90 फूट असून 90 फूट उंची आहे. गोलाकार घुमटाखाली साकारलेला तब्बल 36 फुटी नयनरम्य गाभारा हे यंदाचे वैशिष्टय आहे.
