राज्यात विविध अपघातात एका दिवसात 23 बळी
पुणे-सातारा महामार्ग हा काळा डाग आहे, अशी कबुली कालच खुद्द केंद्रीय रस्ते वाहतूक मंत्री नितीन गडकरींनी दिली होती. त्याच्या काही तासातच म्हणजे काल पुण्याजवळच्या शिंदेवाडीत एसटी आणि ट्रकचा भीषण अपघात झाला. यात सुदैवाने कुणीही जखमी झालं नाही. मात्र या घटनेला 12 तासही होत नाहीत, तोच पुन्हा अपघात होऊन 11 लोकांनी जीव गमावला आहे.
पुण्याबरोबरच नाशिक जिल्ह्यात झालेल्या दोन अपघातात 10 जणांचा मृत्यू झाला आहे. येवला- मनमाड रस्त्यावर काल संध्याकाळी झालेल्या तिहेरी अपघातात 8 जणांचा मृत्यू झाला. येवल्याच्या बाभूळगाव शिवारात क्रूझर गाडीचं टायर फुटून ती आधी समोरुन येणार्‍या मारुती ओम्नीवर आणि नंतर मागून येणार्‍या बसवर आदळली. क्रूझरमधील लोक सारखपुड्याचा कार्यक्रम आटोपून आपल्या गावी म्हणजे धुळ्याकडे परतत होते. दुसरीकडे आज पहाटे मनमाड-मालेगाव जवळ अक्टिव्हा गाडीला अज्ञात वाहनाने धडक दिली आहे. ज्यात प्रसिद्ध कांदा व्यापारी इंदर चोपडा यांचा मृत्यू झाला. तर त्यांचे कर्मचारी संजय ठुबे यांचाही उपचारादरम्यान मृत्यू झाला.
