सर्वोदय साखर कारखान्याची निवडणूक बिनविरोध होणार
या साखर कारखान्याच्या पंचवार्षिक निवडणुकीत 21 जागांसाठी एकूण 35 उमेदवारी अर्ज दाखल झाले आहेत. दाखल उमेदवारी अर्ज मागे घेण्याची अंतिम मुदत दि. 21 जून असून याच दिवशी या निवडणुकीचे चित्र स्पष्ट होणार आहे. या साखर कारखान्याच्या मतदार यादीविरोधात जयंत पाटील गटाने मुंबई उच्च न्यायालयात दाखल केलेली याचिका मागे घेतल्याने या निवडणुकीचा मार्ग मोकळा झाला होता. मात्र या गटाच्यावतीने कोणीही उमेदवारी अर्ज दाखल न केल्याने आता ही निवडणूक बिनविरोध होण्याचा मार्गही मोकळा झाला आहे.
या निवडणुकीत संभाजी पवार गटाकडून 21 पैकी 20 जागांवर 35 उमेदवारी अर्ज दाखल झाले आहेत. यात महिला गटातील दोन जागांसाठी सुजाता पाटील (मौजे डिग्रज) व सुमन चौगुले (कसबे डिग्रज) यांचा, तर इतर मागासवर्गीय गटातून रहिमान मुलाणी (समडोळी) व व्यक्तिगत संस्था गटातून शलाका पवार (सांगली) यांचा उमेदवारी अर्ज दाखल आहे. या तीनही गटात जितक्या जागा तितकेच अर्ज दाखल झाल्याने त्या गटातील उमेदवार बिनविरोध निवडून येणार आहेत.
