फ्रेंच ओपन स्पर्धेत गतविजेत्या जोकोव्हिचला धक्का

पॅरिस, दि. 08 - फ्रेंच खुल्या टेनिस स्पर्धेत गतविजेत्या द्वितीय मानांकित सर्बियाच्या नोव्हाक जोकोव्हिचला पराभवाचा धक्का बसला. उपांत्यपूर्व फेरीत ऑस्ट्रियाच्या  डॉमनिक थीमने जोकोव्हिचला 7-6 (7-5), 6-3, 6-0 असे पराभूत केले. पहिला सेट फार चुरशीचा झाला. दोन्ही खेळाडू तोडीस तोड खेळत होते. अखेर  टायब्रेकरमध्ये थीमने पहिला सेट जिंकला. पुढील दोन सेटमध्ये मात्र तशी रंगत पाहायला मिळाली नाही. जोकोव्हिचची सामन्यातील कामगिरी हळूहळू खराबच होत  गेली. दुसरा सेट जोकोव्हिचने 3-6 असा गमावला. तर तिस-या सेटमध्ये थीमने जोकोव्हिचला डोकेही वर काढू दिले नाही. तिस-या सेटवर निर्विवाद वर्चस्व राखत  थीमने स्पर्धेच्या उपांत्य फेरीत प्रवेश केला.