लोकसहभागातून कोरेगावकरांनी केलेले काम प्रेरणादायी : सिंघल
कोरेगाव तालुक्यातील कुमठे येथील तीळगंगा नदीवर असणार्या ब्रिटीशकालीन बंधार्याच्या कामाची जिल्हाधिकारी श्वेता सिंघल यांनी पाहणी केली. यावेळी प्रांताधिकारी हिम्मत खराडे, तहसिलदार स्मिता पवार, नायब तहसिलदार रवींद्र रांजणे, तालुका कृषी अधिकारी सुनील साळुंखे, उपअभियंता बी. एस. पाटील, जनकल्याण समितीचे पंडितराव कुलकर्णी, ग्रामस्थ उपस्थित होते.
400 मीटर लांबी, 80 मीटर रुंदी आणि 3 मीटर उंची असणार्या या बंधार्यातील 48 हजार घनमीटर गाळ अवघ्या 15 दिवसात काढण्यात आला आहे. कोरेगाव नगरपंचायत आसरे, कुमठे, जनकल्याण समिती, शरयू फौंडेशन, स्थानिक स्तर विभाग आदींच्या लोकसहभागातून हे काम सुरु आहे. बंधार्यामध्ये सध्या धोम कालव्यामुळे मोठ्या प्रमाणात पाणी आहे. या कालव्यामुळे कोरेगाव, कुमठे, आसरे या गावांना फायदा होणार आहे. जिल्हाधिकारी सिंघल यांनी या कामाबद्दल ग्रामस्थांचे मनापासून कौतुक करुन त्या म्हणाल्या, अत्यंत सुंदर आणि प्रेरणादायी काम सर्वांनी मिळून केले आहे. अशा पध्दतीने आपण लवकरच टंचाईवर मात करु. त्यासाठी यामध्ये सातत्य ठेवावे.
