पनवेल महानगरपालिकेत भाजपला स्पष्ट बहुमत

नवी मुंबई, दि. 26 - पनवेल महापालिकेत भाजपने मुसंडी मारत स्पष्ट बहुमत मिळवलं आहे.  भाजपने  एकूण 78 पैकी 51 जागांवर विजय मिळवत बहुमताचा 40 चा आकडा सहज पार केला आहे. दुसरीकडे शेतकरी कामगार पक्ष, काँग्रेस आणि राष्ट्रवादीच्या महाआघाडीने केवळ 27 जागांपर्यंतच मजल मारली . तर शिवसेना आणि स्वाभिमानी शेतकरी संघटनेच्या युतीला एकही जागा मिळाली नाही.
महाआघाडीमधील शेकापला 23, काँग्रेसला 2 तर राष्ट्रवादी काँग्रेसला 2 जागा मिळाल्या. नव्याने स्थापन झालेल्या पनवेल महापालिकेसाठी पहिल्यांदाच निवडणूक होत आहे.  78 जागांसाठी 20 प्रभागातून उमेदवार निवडण्यात आले. यामध्ये 18 प्रभागातून प्रत्येक 4 तर 2 प्रभागात 3-3 (6) उमेदवार महापालिकेत जातील. पनवेलमध्ये एकूण 53 टक्के मतदान झालं होतं. त्यासाठी 418 उमेदवार रिंगणात होते. भाजप आमदार प्रशांत ठाकूर यांच्या नेतृत्त्वात भाजप स्वबळावर लढत आहे. तर शिवसेना आणि स्वाभिमानी शेतकरी संघटनेची युती आहे. दुसरीकडे शेतकरी कामगार पक्ष, काँग्रेस आणि राष्ट्रवादीची महाआघाडी रिंगणात आहे. खरी लढत भाजप आणि महाआघाडीचीच आहे.