चोरीला गेलेल्या 33 दुचाकी जप्त

सोलापूर, दि. 26 - पोलिसांनी सोमवारी सुमारे 33 दुचाकी जप्त केल्या आहेत. यात सहा जणांना अटक झाली असून दोघेजण अल्पवयीन आहेत. ज्या नागरिकांची  दुचाकी चोरीला गेली आहे त्यांनी पोलिस ठाण्यात जाऊन पाहणी करावी, असे आवाहन पोलिसांनी केले आहे.
सदर बझार पोलिसांनी शरद कुमार घोडके (वय 34, रा. लोकसेवा हायस्कूलजवळ, सोलापूर) याला अटक केली आहे. त्याच्याकडे 17 दुचाकी सापडल्या आहेत.  घोडकेचा साथीदार रवी बाबासाहेब उबाळे (वय 32, रा. काटीसावरगाव, तुळजापूर) यालाही अटक आहे. जेल रोड पोलिसांनी अनिल रामपुरे (वय 22, रा.  सिद्धेश्‍वरनगर भाग एक, स्वागतनगर) याला अटक केली आहे. त्याला मार्केट यार्डजवळ ताब्यात घेण्यात आले. मागील आठ महिन्यांपासून 11 दुचाकी चोरी केल्याचे  समोर आले आहे. त्याच्याकडून बारा दुचाकी जप्त केल्या आहेत.
फौजदार चावडी पोलिसांनी मोबीन अब्दुल रजाक (वय 30, रा. काडादी चाळ, सिद्धेश्‍वर पेठ) याला अटक केली आहे. त्याचे आणखी दोन अल्पवयीन साथीदार  आहेत. जप्त केलेल्या दुचाकीत बुलेट, शाईन, अ‍ॅक्टिव्हा, स्प्लेंडर अशा विविध प्रकारच्या 33 दुचाकी आहेत. ही कारवाई पोलिस निरीक्षक संजय जगताप, संतोष  काणे, श्री. सय्यद, डीबी पथकाचे फौजदार श्री. हंचाटे, सचिन बनकर, शैलेश खेडकर त्यांच्या पथकाने केली. दुचाकी चोरांवर प्रतिबंधात्मक कारवाई करता येईल का  याची चाचपणी सुरू असल्याची माहिती उपायुक्त अपर्णा गीते यांनी दिली. पोलिस आयुक्त महादेव तांबडे यांनी तपास पथकाचे अभिनंदन करीत रिवॉर्ड देण्यात येणार  असल्याचे सांगितले.